გაზიფიცირების სამუშაოები ჩხოროწყუს მუნიციპალიტეტში

საქართველოს გაზის ტრანსპორტირების კომპანიამ სამეგრელოს რეგიონში, ჩხოროწყუს მუნიციპალიტეტში, გაზიფიცირების მასშტაბური სამუშაოები განახორციელა. ჩხოროწყუში არასოდეს ყოფილა ბუნებრივი გაზი, ამიტომ განსაკუთრებით დიდი სამუშაოები ჩატარდა. აშენდა 24 341 გრძივი მეტრი მკვებავი და ქსელის მოწყობისთვის საჭირო 68 344 გრძივი მეტრი გაზსადენი. 1609 აბონენტს  საშუალება მიეცა ისარგებლოს  ბუნებრივი გაზით.
   მოსახლეობის გაზიფიცირების 2019-2021 წლის გეგმით გათვალისწინებულია  ჩხოროწყუს მუნიციპალიტეტის  19 სოფლის გაზიფიცირება.
საქართველოს გაზის ტრანსპორტირების კომპანია, მთავრობის 2019 წლის 5 აპრილის N791 განკარგულების საფუძველზე, სამწლიანი გეგმის ფარგლებში,  სამეგრელოს რეგიონში 88 დასახლებული პუნქტის გაზიფიცირებას განახორციელებს და 34 101 აბონენტს მიეცემა შესაძლებლობა ჩაერთოს ბუნებრივი გაზის საერთო ქსელში.