მიმდინარე წლის 10 ივლისიდან დაიწყო „ყაზახ-საგურამოს“ სატრანზიტო DN-1000 მმ მაგისტრალური გაზსადენის კაპიტალური სარეაბილიტაციო სამუშაოები, რაც მოიცავს მწყობრიდან გამოსული N303-ე და N304-ე საონკანო კვანძების ახლით შეცვლას, სავარაუდო გამჭოლი კოროზიული ხვრელებისა და საიზოლაციო საფარის აღდგენას, ასევე ბაქო-თბილისის სარკინიგზო გადასასვლელის ქვეშ არსებული მონაკვეთის რეაბილიტაციას. აღნიშნული სამუშაოების მიმდინარეობისას, მიმდინარე წლის 10 ივლისიდან 10 აგვისტოს ჩათვლით, სრულად შეწყდება ბუნებრივი გაზის ტრანზიტი სომხეთის რესპუბლიკის მიმართულებით, რაც შეთანხმებულია როგორც სომხეთის რესპუბლიკასთან, ისე რუსეთის ფედერაციასთან. უნდა აღინიშნოს, რომ მსგავსი მასშტაბის სამუშაოები აღნიშნულ გაზსადენზე უკანასკნელი 30 წლის განმავლობაში არ განხორციელებულა. სარეაბილიტაციო სამუშაოების დასრულებისთანავე ერთი-ორად გაიზრდება გაზსადენის უსაფრთხოებისა და ეფექტური მართვის შესაძლებლობა. ასევე მნიშვნელოვანია, რომ გარკვეულწილად შემცირდება მილსადენიდან ბუნებრივი გაზის დანაკარგი.    

  შპს „საქართველოს გაზის ტრანსპორტირების კომპანია“ ახორციელებს სარეაბილიტაციო სამუშაოებს ვლადიკავკაზ-თბილისის მაგისტრალური გაზსადენის კმ.ნ. 85+00-სა და ჩრდილოეთ კავკასია-ამიერკავკასია კმ.ნ. 173+500-ზე. მდინარე ბიდარას მარცხენა ნაპირზე განვითარებულმა ეროზიულმა პროცესებმა გააშიშვლა მილსადენი და დააზიანა საექსპლუატაციო დერეფანი. აღნიშნული პროცესების ლიკვიდაციის მიზნით შპს „საქართველოს გაზის ტრანსპორტირების კომპანიაში“ დამუშავდა ფერდის აღდგენის პროექტი გაბიონების წყებით. ამ ეტაპზე ხორციელდება საინჟინრო-ტექნიკური პროექტით გათვალისწინებული აქტიური სარეაბილიტაციო სამუშაოები, რომელიც მიმდინარე წლის 15 ივლისამდე დასრულდება.                              

„ქოთელია-ასპინძა-ახალციხის“ მაგისტრალური გაზსადენის „ასპინძა-ახალციხის“ მონაკვეთის მშენებლობისას სოფელ ჭობარეთის მიმდებარედ 2007 წელს აღმოჩენილ იქნა კულტურული მემკვიდრეობის ძეგლი, ადრებრინჯაოს ხანის ნასახლარი. აღნიშნულ ძეგლზე მას შემდეგ ყოველ წელს მიმდინარეობს არქეოლოგიური სამუშაოები და შპს „საქართველოს გაზის ტრანსპორტირების კომპანია“ აქტიურად თანამშრომლობს არქეოლოგთა ჯგუფთან. მათთვის გაიცემა ნებართვა დერეფანში შეშვებისა და ადგილზე მუშაობისათვის. არქეოლოგთა ჯგუფი ადგილზე შესაბამის არქეოლოგიურ სამუშაოებს წელსაც აქტიურად აწარმოებდა.